Monday, December 15, 2014

క్యాబినెట్ విస్తరణ కసరత్తు, కెసిఆర్ కు ఎంత సవాల్

రేపు కెసిఆర్ తొలిసారిగా తన క్యాబినెట్ ను విస్తరించనున్నారు. ఇప్పటికే అసంతృప్తి కనిపిస్తోంది. ఉపముఖ్యమంత్రి అవుతానంటున్న కొప్పుల ఈశ్వర్ కు ఛీఫ్ విప్ పదవి మాత్రమే మిగలటంతో ఆయన అసంతృప్తి వ్యక్తం చేస్తున్నారు. కానీ మరికొందరు ఆశావహులు పదవి దొరకక పోతే సహజంగానే అసంతృప్తి చెందవచ్చు. ఎప్పుడుఎక్కడ మంత్రివర్గ విస్తరణజరిగినా ఇది మామూలే కానీ కొన్ని సందర్భాలలో మాత్రమే ఈ అసంతృప్తి కాస్తా అసమ్మతిగా మారుతుంది.కానీ కెసి ఆర్ కు ఆ ప్రమాదం ఏమీ లేదు. పార్టీలోనూ ప్రభుత్వం లోనూ ఆయనకు ఎదురు లేదు. ఇతర పార్టీలలోంచి ఎమ్మెల్యేలను చేర్చుకుని బొటాబొటి మెజారిటీని కాస్తా తిరుగులేని ఆధిక్యతగా కెసిఆర్ మార్చుకోగలిగారు. రాజకీయ విలువల సంగతి ఎలా వున్నా పెరిగిన బలంతో కెసిఆర్ అసంతృప్తులకు చెక్ పెట్టగలుగుతున్నారు. ఈ లోగా పార్లమెంటరీ సెక్రటరీల పదవులను పునరుద్దరించి కొంతమందినైనా సర్దుబాటు చేయగలిగారు. ఇంకా కార్పోరేషన్ చైర్మనులున్నాయి. విప్ పదవులను కొందరికి సర్ధుబాటు అయిపోయింది. జిల్లాలో కులాలు వ్యక్తుల మధ్య బ్యాలెన్సు చేస్తూ కెసిఆర్ కసరత్తు చేస్తున్నారు. అధినాయకుని కరుణకోసం వేచిచూడటమే తప్ప ఆశావహులు చేయగలిగిందేమీ కనిపించడం లేదు. ఉద్యమ కాలంలోతిరుగుబాట్లను ఎదుర్కొన్న కెసిఆర్ ముఖ్యమంత్రిగా అయ్యాక పార్టీలోనూ ప్రభుత్వంలోనూ తనకెదురే లేకుండా చేసుకోగలిగారు. 

Thursday, December 11, 2014

ప్రశ్నిస్తానన్న పవన్ కళ్యాణ్ ఎక్కడున్నారో మీకేమైనా తెలుసా?

జనసేనను ఎన్నికల కమీషన్ రాజకీయ పార్టీగా గుర్తించింది. 

 పార్టీని ప్రారంభిస్తూ తెలుగు వారికి జరిగే అన్యాయాలను ప్రశ్నించేందుకే జనసేన పెడుతున్నానని పవన్ కళ్యాణ్ ప్రకటించారు. పవన్ కు నిజాయితీ ఎక్కువే ఆవేశమూ ఎక్కువే ఆయన హృదయం స్పందించింది అని ఆయన సన్నిహితులు చెప్పారు. సామాజిక సృహ వున్న వాడని దాదాపు అందరూ అంటుంటారు. అందుకే తెలుగు సమాజం పవన్ కళ్యాన్ నుంచి చాలా ఆశించింది.  అన్న చిరంజీవి ప్రజారాజ్యాన్ని కాంగ్రెస్ లో కలిపినపుడు పవన్ ప్రశ్నించలేదని విమర్శ వుండవచ్చు కానీ అదే సమయంలో అన్న అడుగుజాడల్లో నడవలేదన్న వాస్తవాన్ని కూడా విస్మరించలేము ప్రశ్నిస్తానంటూ ప్రజాజీవితంలోకి వచ్చిన పవన్ కళ్యాణ్ ప్రశ్నించాల్సిన సమయం వచ్చినపుడు కూడా ఎందుకని మౌనంగా వుంటున్నారు. 

కేంద్ర బడ్జెట్ లో కూడా రెండు తెలుగు రాష్ట్రాలకు దాదాపు మొండిచేయే చూపారు. రైల్వే బడ్జెట్ లో కేంద్రం కమిటీ వేసి చేతులు దులుపుకుంది. ఇదంతా చూస్తూ కూడా ఆవేశపరుడైన పవన్ ఎందుకు ప్రశాంతంగా వున్నారు. 

విభజన సమయంలో సీమాంధ్రకు అన్యాయం జరిగిందని పవన్ ఆవేదన చెందారు. కానీ విభజన తర్వాత ఫీజుల చెల్లింపు కృష్ణా నీటివిడుదల , విద్యుత్ ఒప్పందాలు ఇలా అనేక వివాదాలు ముందుకొచ్చినపుడు కూడా పవన్ మాట వినిపించడం లేదు. 

పార్టీల కోసం కాదు, పదవుల కోసం అంతకంటే కాదు. ప్రజల తరపున ప్రశ్నించేందుకే జనసేన అంటూ పవన్ నినదించారు. కానీ సిమెంట్ పంచదార , వంటగ్యాసు, కిరోసిన్ ఇలా ధరలు పెరుగుతున్నా ఎందుకని పవన్ కనిపించడం లేదు.? 

మోడీ వద్దకు ప్రజల తరపున ఎందుకని ప్రాతినిధ్యం వహించడం లేదు. సినిమా షూటింగులలోనూ ఎంత తీరిక లేకుండా వున్నా నోరు విప్పేందుకు కాస్తంత సమయం చాలు. అందులోనూ మోడీ వద్ద పలుకుబడి వున్న పవన్ అవసరం ఇప్పుడ చాలా వుంది.

25 ఏళ్ళ రాజకీయ దార్శనికతతో జనసేన పెట్టానన్నారు పవన్ లోకకళ్యాణం కోసం వచ్చిన ఈ పార్టీ బలమైన రాజకీయ పవనాలు వీచాలంటే పార్టీ నిర్మాణం అవసరం కానీ ఎందుకని ఆదిశగా ప్రయత్నమే లేదు.

తెలుగు సమాజం పిలుస్తోంది, పౌర సమాజం ఆశిస్తోంది.

పవన్ మౌనానికి కారణం ఏమిటని ప్రశ్నిస్తోంది.

ప్రశ్నించడమే పవనిజం కదా మరి?

Tuesday, December 2, 2014

వేతన సవరణకై బ్యాంకు ఉద్యోగుల డిమాండ్లలో న్యాయం ఎంత?

దేశ వ్యాపితంగా బ్యాంకు ఉద్యోగులు మెరుగైన వేతన సవరణ కోరుతూ నేడు సమ్మె చేస్తున్నారు.

 వేతన సవరణకై బ్యాంకు ఉద్యోగులు చేస్తున్న డిమాండ్ లో న్యాయం ఎంత?


  1.  ప్రభుత్వ రంగ బ్యాంకుల లాభాలు పెరుగుతున్నాయి. అవి జరుతుపుతున్న వ్యాపార లావాదేవీల మొత్తం విలువ పెరుగుతుంది. అందుకే పదిలక్షల మంది బ్యాంకు ఉద్యోగులకు మెరుగైన వేతనాలు ఇవ్వగలిగే ఆర్ధిక సామర్ధ్యం ప్రభుత్వ రంగ బ్యాంకింగ్ రంగానికి వుంది. అధికార గణాంకాల ప్రకారమే 2007వ సంవత్సరంలో దేశం లోని మొత్తం ప్రభుత్వ రంగ బ్యాంకులు 33 లక్షల కోట్ల వ్యాపారం చేశాయి. ఇది 2012 లో 85 లక్షల కోట్లకు పెరిగింది. అదే విధంగా ఇదే కాలంలో ఒక ఉద్యోగిపై బ్యాంకులు జరిపిన తలసరి వ్యాపారం విలువ 7.55 కోట్ల నుంచి 15 కోట్లకు పెరిగింది. ఇక 2007- 12 మధ్య కాలంలో ప్రభుత్వరంగ బ్యాంకుల లాభాలు 42 వేల 655 కోట్ల నుంచి లక్షా 16 వేల కోట్లకు పెరిగింది. ఒక ఉద్యోగిపై బ్యాంకులు సంపాదించిన తలసరి లాభం 4.57 కోట్ల నుంచి 8.42 కోట్లకు పెరిగింది. ఈ లెక్కల ప్రకారం చూస్తే ఉద్యోగుల వేతనాలు పెంచేందుకు బ్యాంకులకు ఆర్థిక సామర్థ్యం ఉందని స్పష్టంగా అర్ధమవుతోంది.
  2. 2012 సంవత్సరం నాటికి ప్రభుత్వరంగ బ్యాంకులు ఉద్యోగుల జీతభత్యాలపై 32 వేల కోట్లు ఖర్చు చేశాయి. ఇప్పుడు దీనిపై 11 శాతం అధికంగా జీతాలు పెంచేందుకు బ్యాంకు యాజమాన్యాలు అంగీకరించాయి. కానీ బ్యాంకు ఉద్యోగులు అడుగుతున్నది 25 శాతం పెరుగుదల.ఈ డిమాండ్ ను అంగీకరిస్తే యాజమాన్యానికి అదనంగా ఖర్చయ్యేది కేవలం 4 వేల కోట్లు మాత్రమే. యాజమాన్యాల వైఫల్యం వల్ల, ప్రభుత్వ అసమర్థత వల్ల ప్రభుత్వరంగ బ్యాంకుల్లో పోగుపడిన మొత్తం మొండిబాకీలు 2 లక్షల 68 వేల కోట్లు. మాఫీ చేసిన మొండి బాకీల విలువే 27 వేల కోట్లు. బడా కుబేరులకు 27 వేల కోట్ల రుణాలను అప్పనంగా మాఫీ చేయగలిగిన యాజమాన్యం 10 లక్షల ఉద్యోగుల సంక్షేమానికి 4 వేల కోట్లు ఖర్చు చేయలేవా?
  3. ఇతర రంగాల్లో వేతన పెరుదలతో పోలిస్తే బ్యాంకు ఉద్యోగులు అడుగుతున్నవి ఎక్కువేమీ కాదు. 2007 లో 17శాతం వేతనాలు పెరిగాయి. 2009 లో రాష్ట్ర ప్రభుత్వ ఉద్యోగులకు 39 శాతం పెరుగుదల ఇచ్చారు. బ్యాంకు ఉద్యోగులతో పోలిస్తే ఇతర కేంద్ర ప్రభుత్వ ఉద్యోగులకు కూడా వేతనాలు ఎక్కువగానే పెరిగాయి. ఉదాహరణకు కోల్ ఇండియాకు 25 శాతం, స్టీల్ ఇండియాలో సుమారు 22 శాతం  మేరకు జీతభత్యాలు పెరిగాయి. గతయూపీఏ ప్రభుత్వం కేంద్రప్రభుత్వ ఉద్యోగులకు 32- 35 శాతం మేరకు వేతనాలు పెంచేందుకు ఏడో వేతన సంఘానికి ప్రతిపాదనలు పంపించాయి. 
  4. ఇప్పుడు పెరుగుతున్న వేతనాలు ఐదేళ్ళ పాటు అమలులో వుంటాయి. ఈ లోగా పదిహేను శాతం ఉద్యోగులు రిటైర్ అవుతున్నారు. కొత్త నియామకాలు చేసినా కూడా వేతన బిల్లు తగ్గుతుంది.
(ప్రొఫెసర్.కె.నాగేశ్వర్)


Friday, November 28, 2014

కాంగ్రెస్ టిడిపి ల విప్ జారీలో వ్యూహం ఏమిటి?

ద్రవ్యవినిమయ బిల్లుపై నేడు అసెంబ్లీ చర్చ చేపట్టింది. దీన్ని ఈ రోజే ఉభయ సభలు ఆమోదించాల్సి వుంది. సమజంగా బడ్జెట్ పద్దులకు చట్టబద్దత కల్పించే ద్రవ్య వినిమయ బిల్లును మూజు వాణి ఓటుతో సభలు ఆమోదిస్తూ వుంటాయి. కానీ దీనిపై ఓటింగ్ కు పట్టుబట్టాలని కాంగ్రెస్ టిడిపిలు నిర్ణయించాయి. తమ పార్టీ సభ్యులకు విప్ లను కూడా జారీ చేసాయి. దీనివెనుక వ్యూహం ఏమిటి?

Friday, November 7, 2014

ITIR లో తెలంగాణా స్థానికులకు రిజర్వేషన్లు ఉండవు, స్పష్టంచేసిన ప్రభుత్వం

హైదరాబాదు నగరంలో ఐటిఐఆర్ ప్రాజెక్టు రాబోతోంది. ఐతే ఇందులో లభించే ఐటి ఉద్యోగాలలో తెలంగాణా స్థానికులకు రిజర్వేషన్లు ఉండవని టిఆర్ ఎస్ ప్రభుత్వం ప్రకటించింది. రాష్ట్ర విభజనతో హైదరాబాదులో ఉద్యోగాలు కోల్పోతామన్న వారి ఆందోళనను ప్రభుత్వ ప్రకటన సంతృప్తినివ్వవచ్చు. అయితే తెలంగాణా వస్తే తమకు ఉద్యోగాలు వస్తాయనుకున్న స్థానిక యువతకు ప్రభుత్వ ప్రకటన నిరాశ పరచవచ్చు.

ప్రయివేటు రంగంలో వచ్చే ఈ ఐటి ఉద్యోగాలను స్థానికులకు రిజర్వేషన్లివ్వడం సాధ్యం కాదని తెలంగాణా ప్రభుత్వం స్పష్టం చేసింది. అయితే ఎలాంటి నైపుణ్యం లేని ఉద్యోగాలూ, సెమీ స్కిల్ డ్ ఉపాధి అవకాశాలలో మాత్రం స్థానికులకు ఓ మేరకు అవకాశం లభించేలా యత్నిస్తామని ప్రభుత్వం చెప్పింది.

ఐటి ఐఆర్ ద్వారా పదిహేను లక్షల మందికి ప్రత్యుకంగానూ మరో 50 లక్షల మందికి పరోక్షంగానూ ఉపాధి లభిస్తుందని అంచనా. 

Wednesday, November 5, 2014

2శాతం నిధులతో తెలంగాణాలో విద్యుత్ సంక్షోభాన్ని పరిష్కరించగలరా?

తెలంగాణా రాష్ట్రంలో తీవ్ర విద్యుత్ సంక్షోభం నెలకొని వుంది. ఈ బడ్జెట్ లో విద్యుత్ రంగానికి ప్రణాళికా వ్యయం క్రింద వెయ్యికోట్లు మాత్రమే కేటాయించారు. ఇది మొత్తం ప్రణాళికా వ్యయంలో 2శాతం మాత్రమే.

ఇంత తక్కువ కేటాయింపులతో విద్యుత్ సంక్షోభాన్ని తీర్చగలమా? అయితే ఇవి తెలంగాణా జెన్ కో కు చేసిన కేటాయింపుల ప్రయివేటు రంగంలో కూడా విద్యుత్ ఉత్పత్తి అవుతుంది. అని ప్రభుత్వం సమాధానం చెప్పేవచ్చు.
(ప్రొఫెసర్.కె.నాగేశ్వర్)

17 శాతం లోటుతో తెలంగాణాలో లక్షకోట్ల బడ్జెట్

లక్షకోట్లతో తెలంగాణా రాష్ట్ర తొలి బడ్జెట్ ను ప్రవేశ పెట్టారు. పొరుగురాష్ట్రమైన ఆంథ్రప్రదేశ్ తో పోటీ పడుతూ తెలంగాణా ప్రభుత్వం కూడా బడ్జెట్ ను లక్ష కెోట్లను దాటించింది. అయితే మొత్తం బడ్జెట్ లోనే కాదు. లోటులోనూ కూడా ఆంధ్రప్రదేశ్ ప్రభుత్వంతో తెలంగానా సర్కార్ పోటీ పడింది. ఆంధ్రప్రదేశ్ ప్రభుత్వం కేంద్రం నుంచి నిధులొస్తాయన్న ఆశతో బడ్జెట్ లో భారీ అంచానాలు చేసింది. తెలంగాణా ప్రభుత్వం కూడా అదే పని చేసింది. తెలంగాణా బడ్జెట్ లో ద్రవ్యలోటు 17 శాతం గా వుంది. ఇది రాష్ట్ర ఆదాయంలో సుమారు 5శాతం. ఈ లోటును  పూడ్చుకోలేక పోతే చేసిన అంచనాలలో కోత తప్పదు.

(ప్రొఫెసర్.కె.నాగేశ్వర్)